越過大帽找梧桐

好耐好耐冇行山…

今日有人帶路，於是行山之前我完全冇做資料搜集。對大帽山既認識就係山高海拔7000米，係全港最高既山。一年前行大東山都覺得辛苦（果陣體能差），所以一直覺得大帽山會好難行。但因為是在太掛住陽光，所以義無反顧就跟人行喇。

朋友一早已經探左路，帶我地行捷徑。為左一個字「爽」，我著左短褲。冇諗過呢條捷徑沿途都係拮/戒既植物。呼籲行山既大家都係著返條長褲…TT

捷徑斜度大。但原來呢段路已經係最辛苦既部分。之後都係行斜路上山，再行斜路落山。

黎到大帽山最高點，見到屋仔。裡面有大樽裝水、飯煲、雪櫃。唔知邊個住係呢度呢？

我地行山當日，咁啱有一個跑山比賽舉行。參加者既比賽戰衣好彩色，面、手臂上又有彩色水印紋身。我地一邊行為佢地「加油！」打氣。平時搭地鐵審視眾生相，點解香港人都咁唔fit？今日我卻係山上面發現左一群好fit既香港生物。好開心。

討論住比賽既形勢、參賽者既表現，沿途有趣既風光令呢條上山既漫漫斜路好易走。

見唔見到D一粒粒既人？佢地好努力錦跑落斜路。

好投入既參賽者！～今日涼亭比佢地霸左添。

到左涼亭，就落山開始尋找瀑布既路程。第一條見到既係散髮㳍。

梧桐寨其實已經黎過一次。友人係個攝影高手，想視察下梧桐寨瀑布可以如何影婚紗相。新娘當然係到達瀑布先換婚紗，但體能差D都會覺得辛苦（因為攝影高手同助手當日都覺得好辛苦哈哈哈）。

雖然瀑布之前睇過，但近日水量特別多。好靚好壯觀。係山頂曬到汗流浹背，到瀑布呢到感受到陣陣涼風。好舒服。

散髮㳍

散髮㳍旁邊既「神秘山洞」

散髮布之後係主瀑、中瀑、井底瀑。

井底瀑雖然細，行左三個瀑布之後，你會覺得好普通，想快D落山skip左佢。但佢既beauty係在於周圍既欗藤。

我鍾意行山，係因為沿途好多時都有得意既野。今日既大帽山有精彩既跑山比賽（食花生心態:p）、飛鵝山有高過頭既「粟米田草」、獅子山有獅子頭。就算係研究下植物，都可以令我放低城市裡面繁瑣既野，俾自己八個鐘完全唔睇電話唔覆機既藉口。冇野煩既時候，又可以當行山攞下靈感。

《完》

Happy Hiking!